Articles and Stories
Në dorë të zotit a të djallit
mes jetës dhe vdekjes
si cung pres
Nesër
mund t'jua lexoj horoskopin
Mos qeshni
me fatin tim të keq
Vdekja të ndjek pas si bishë
udhët zgjaten drejt klinikës
ti fle në ëndërr të keqe pa shpresë
Në shishe nuk është jeta
engjëlli im i vogël
Një brengë e moçme
një flakë e zezë
Një kujtim i bleruar
bëhet peshk në liqenin e tharë
Engjëlli zbret nga korniza
Ushqehesh me konzerva
fle me klosharë
stacioneve të Evropës
Ka shumë vite
që tërheq dhembshëm
litarin e ëndrrave boshe
Theje trekëndëshin të lutem
Në detin e zhgënjimit
barka e shpresës përmbyset
fundosem i tëri
Për sytë e saj
kapem si për kashte
Nuk e prek fundin
do t'i ha edhe thonjtë
Nga maja e Lubotenit
si ortek bore rrëshqet
loti i dëshpërimit
Do të doja të shkrihet
në zemrën e saj
për ta njomur
zemrën time të gurëzuar
Ta dini
kam shpirt të butë
shikim engjëlli
zemër të gurtë kam
Më pranoni kështu si jam
mëkatet ti djegim s'bashku
Bredh zikzakeve të jetës
me fatin e keq në dorë
unë biri i mallkimit
Hyj me vështirësi
në koridorin plot mëkate
Mezi e gjej
dhomën e vetmisë
Nga babai kopil dreqi
e nëna virgjëreshë
shpërlan udhët e qytetit
Kujt i duhet dashuria e saj
me zemër plastike
I frikësohem dimrit
bardhësisë së zezë
më të bardhë se qefini
Mos ma merrni për të keq
kam zemër trumcaku
